Bedehusa har alt ein fotograf kan drøyma om. Strietapet og røyrstolar, falma jesusbilete og norskproduserte industrilamper, hekla dukar og bulka kaffikjelar, døden på Golgata og vona om evig liv. Ingen andre gudshus i verda ser ut som norske bedehus.

Fotograf Erlend Berge har vitja alle landets fylker og dokumentert ein kulturskatt som er i ferd med å bli borte.

Boka inneheld portrett av 114 bedehus. Ikkje eit menneske er med, fotografen vil at den som ser skal tre inn i eit rom og åpne opp for kjenslene og tolkningane som bilda skapar.